Brot á ferðmarkið við ávikavist 21 km/t og 16km/t og meira

Tú fært eitt klipp, um tú við t.d. persónbili ella vørubili undir 3.500 kg heildarvekt koyrir 21 km/t oman fyri loyvda ferðmarkið. Støddin á bótini hongur saman við ferðini.

Tú skalt altíð laga ferðina eftir umstøðunum. Hvussu er sýnið? Hvussu er veðrið? Hvussu er vegurin at koyra á? Hvussu er bilurin at koyra? Hevur tú nógv í lastini?

Í talvuni niðanfyri sært tú, hvussu ymisku brotini á ferðmarkið verða revsað:

Um tú koyrir framvið reyðum ljósi (§ 24, stk. 1 og 2)

Tú fært eitt klipp fyri at koyra framvið reyðum ljóssignali.

Koyrir tú við ov stuttari fjarstøðu til framman fyri koyrandi akfar (§ 29a, stk. 3, 1. pkt.)

Tú fært eitt klipp, um tú koyrir ov nær bilin frammanfyri.

Tað er ikki ásett nakað fast mark fyri, hvussu stór fjarstøðan skal vera við ymiskari ferð. Lógin sigur, at fjarstøðan til bilin frammanfyri skal vera so mikið stór, at vandi ikki er fyri ákoyring, um bilurin frammanfyri steðgar ella minkar um ferðina.

Ásetingin um at hava eina trygga fjarstøðu er galdandi á øllum vegum. Tú fært tó ikki klipp fyri t.d. at standa í einum bilaraði, ella um ein annar bilur knappliga koyrir inn beint framman fyri teg. Klippikortið vendir sær meira móti ferðandi, sum við høgari ferð leggja seg tætt aftan fyri ein bil og harvið leggja trýst á viðkomandi. Politiið metir í hvørjum einstøkum føri um málini, undir hesum um koyringin førir við sær frádøming av koyrikortinum ella klipp.

Politiið kann nýta videoupptøkur frá ómerktum politibilum sum prógv í slíkum málum.

2-sekunds-reglan

Ein góður máti at minna seg á hesa áseting er, at tað í minsta lagi skal vera ein fjarstøða svarandi til 2 sekund til bilin frammanfyri.

Koyrir tú vinstrumegin gøtuhólmar og ferðsluvitar (§ 29a, stk. 4)

Tú fært eitt klipp, um tú koyrir vinstrumegin gøtuhólmar, ferðsluvitar og skákateigar.

Tú skalt halda teg høgrumegin gøtuhólmar, ferðsluvitar, skákateigar og tílíkt, ið er á akbreytini. Tú kanst tó koyra vinstrumegin við, um tað er tilskilað við merking, ella um vegurin er einvegis.

Broytir farleið og støðu v.m. (§ 29b, stk. 2 og § 29d, stk. 1 og 2)

Tú fært eitt klipp, um tú broytir farleið og støðu til vanda og óneyðugan bága fyri onnur.

Tú skal tryggja tær, at tað, tú gert, kann henda uttan vanda ella óneyðugan bága fyri onnur, tá tú:

• sneiðir á krossvegi
• fert avstað frá vegjaðara
• skiftir um farbreyt
• á annan hátt førkar akfarið til viks
• steðgar ella minkar um ferðina
• vendir ella bakkar

Brýtur tú ásetingar um yvirháling og forboð fyri yvirháling (§ 31a, stk. 1-3 og § 31c)

Tú fært eitt klipp, um tú brýtur ásetingarnar um yvirháling.

Um tú ætlar at yvirhála, skalt tú tryggja tær:

• at tað er vandaleyst
• at tað er fríur bani
• at bilurin frammanfyri ikki ætlar at yvirhála
• at bilurin aftanfyri ikki er í ferð við at yvirhála
• at tað er gott pláss framman fyri bilin frammanfyri

Yvirháling fer sjálvandi fram vinstrumegin. Tó skalt tú yvirhála høgrumegin, um bilurin framman sneiðir til vinstru.

Økir tú ferðina, tá onkur yvirhálar teg (§ 31b, stk. 1)

Tú fært eitt klipp, um tú økir ferðina, tá onkur yvirhálar teg.

Koyrir tú vandamikla slalom-koyring og framvið-koyring í tættari ferðslu (§31d, stk. 1)

So fært tú bót. Og er ferðslan tøtt og koyrir í fleiri røðum, soleiðis at ferðin verður avgjørd av teimum framman fyri teg, mást tú ikki skifta farbreyt, uttan so er, at tú skalt:

• sneiða á krossvegi
• sneiða av akbreytini uttan fyri krossveg
• sneiða av á avkoyringarbreyt
• sneiða inn á vegin frá tilkoyringarbreyt
• steðga ella parkera

ella um

• talið av farbreytum minkar, tvs. farbreytirnar flætta saman.

Yvirhálar tú við gonguteig (§ 31e)

So fært tú eitt klipp.

Tá tú nærkast einum gonguteigi, mást tú ikki yvirhála ella koyra framvið annað akfar, um so er, at hetta akfar forðar fyri fullum útsýni yvir gonguteigin.

Um tú ikki syrgir fyri, at børn undir 15 ár eru spent í kravdu trygdarútgerðina (§ 42, stk. 6)

Tú fært eitt klipp, um tú sum førari ikki syrgir fyri, at ferðandi í bilinum undir 15 ár eru spent í kravdu trygdarútgerðina í bilinum.

Børn, sum eru fylt 3 ár, men enn ikki 7 ár, kunnu í staðin nýta barnastól. Saman við trygdarbeltinum kann selakoddi brúkast.

Tú fært eit klipp:

• um tú hevur ein ella fleiri ferðandi undir 15 ár, sum ikki eru spent í trygdarbelti

Í bilum uttan belti ella aðra serliga tillagaða útgerð á baksetrinum:

• um tú koyrir børn undir 3 ár í einum bili uttan trygdarbelti ella aðra serliga tillagaða útgerð á baksetrinum, fært tú ikki eitt klipp fyri hetta.

Serásetingar fyri hýruvognar

Í einum hýruvogni er tað tín ábyrgd, at ferðandi í bilinum undir 15 ár eru spent í trygdarbelti. Men tað er ikki krav um, at børn undir 3 ár eru spent føst í serliga tillagaða útgerð, uttan so er, at hetta er í hýruvogninum.

Serásetingar fyri bussar

Bussførari í bili / bussi, sum er góðkendur til 10 persónar ella fleiri, føraran íroknaðan, fær ikki eitt klipp ella bót, um ferðandi undir 15 ár í bilinum / bussinum ikki eru spent føst, treytað av, at førarin hevur kunnað ferðafólkini um, at tey skulu nýta belti. Kunningarskyldan kann verða fylgd við 3 ymiskum møguleikum:

1. Bussurin er útgjørdur við serligum piktogrammi, ið upplýsir um beltaskylduna.

2. Førarin sigur tað við ferðafólkini.

3. Skyldan verður víst á sjónvarpsskíggja í bussinum.

Ferðafólk millum 8–15 ár á motorsúkklu (§ 42a, stk. 2)

Tú fært eitt klipp, um tú ikki syrgir fyri, at ferðafólk millum 8 og 15 ár nýta fastspentan fallhjálm á motorsúkklu ella í síðuvogni.

Børn undir 8 ár á motorsúkklu ella í síðuvogni (§ 43, stk. 4, 2. pkt.)

Tú fært eitt klipp, um tú hevur børn, sum ikki eru fylt 8 ár, á motorsúkklu ella í síðuvogni til motorsúkklu.

Koyrir tú í mótkoyrandi farbreyt (§ 24, stk. 1 og 2)

Tú fært eitt klipp, um tú koyrir móti ferðslurætninginum. T.d. um tú koyrir í skeivari síðu av vegnum ella í mótkoyrandi farbreyt.

Fer um hindrunarstriku undir yvirháling (§ 24, stk. 1 og 2)

Tú fært eitt klipp, um tú fert um hindrunarstriku undir yvirháling. Bót: Hindrunarstrika merkir, at tú ikki má krossa ”adskillelsen” millum farbreytir, heldur ikki tá vent verður, sneiðing á krossvegi, koyring inn á eina ogn ella líknandi.

Er tað neyðugt at fara um hindrunarstriku, t.d. orsakað av vegarbeiði ella steðgaðum ella parkeraðum bili, kanst tú tó við varsemi fara um hindrunarstriku.

Víkiskylda (§ 32, stk. 2 – 4 og 6)

Tú fært eitt klipp, um tú brýtur ásetingarnar um víkiskyldu.

Tað finnast trý sløg: Treytaleys víkiskylda, høgravíkiskylda og vanlig víkiskylda.

Treytaleys víkiskylda

Tú hevur treytaleysa víkiskyldu (tvs. at tú skalt halda av fyri ferðslu frá báðum síðum) við:

• STOP-skelti / steðgilinju. Tú skalt steðga heilt á, áðrenn tú koyrir víðari
• Trýkantskelti (hávatenn-skelti)
• Hávatenn (víkilinju)
• Koyring inn í rundkoyring
• Tá tú koyrir út frá parkeringsøki, ogn ella grundøki, bensinstøð ella øðrum líknandi øki uttan fyri veg, frá gøtu, gonguvegi, dyrkivegi ella líknandi og fyri alla útkoyring frá vegi, sum fer um gongubreyt, súkklubreyt ella síðuøksl, sum er hækkað í mun til akbreytina á tí vegi, sum tú koyrir inn á.

Vanliga eigur tú ikki at ivast í, um tú skalt halda av fyri ferðslu frá báðum síðum.

Bilførarar hava harumframt víkiskyldu fyri súkklum og prutlum og mótkoyrandi ferðslu í sambandi við høgra- og vinstrasving.

Høgravíkiskylda

Høgravíkiskylda er eyðkend av, at tað hvørki eru skelti ella merking á vegnum. Høgravíkiskylda merkir, at tú skalt halda av fyri ferðslu, sum kemur frá høgru.

Vanlig víkiskylda

Her á landi, hava vit harumframt eina triðju víkiskyldu, nevnliga vanlig víkiskylda, har tann, ið kemur frá vegi við lítlari ferðslu, fer inn á ella tvørtur um veg, sum eyðsæð er meira týðandi, so skal tann, sum kemur frá tí minna vegnum, í góðari tíð minka um ferðina og í hóskandi mun sleppa ferðsluni á tí størra vegnum fram.